Sex and Ethics

 

سیکس ءُ ادبداری: تْران ءُ جیڑه ءِ میان ءَ

امین ضامن بلوچ

 I

جوٛن وِلسَن ءِ رِدءَ چونائیا هر وڑیں ادبداریں (ethical) بیانے گوں اے گپ ءَ داں ھَدّے ءَ گیشّیت که ’هر کس راست ءُ رَد ءِ پرک ءَ زانت‘۔ ادبداری ءَ اگاں ما فکری کِردے به کنیں ءُ بِه تپّاسیں، گڑا اولسرا ما’راستال (fact) ءُ کدر (value) ءِ پرمانانی (judgments) میان ءِ پَرک یا پَرکاں نشان کنیں۔ راستالیں پرمان هما پرمان اَنت که آیانی تها اے زانگ بیت که چیز ’چی یے‘، آ چون تجربه بیت ءُ چون بیان کنگ بیت۔ بزاں راستالیں پرمان دری جهان (external world) یا دنیا ءِ جسدی (physical) چیزانی بابت ءَ بنت۔ البته کدری پرمان هما پرمان اَنت که آیانی تها ما اے چاریں که ’بائد چی اِنت، ادبداری ءُ ادبداری ءِ لیکه چی اِنت۔ اے نیام ءَ راستال یک چیزے ءِ کدری بُوَگ ءَ ثابت کُت نه کنت[1]۔ البته کدر یک چیز یا کاررِدے (process) ءِ لیکهی راستی ءَ گیشّینیت ءُ اے شون دنت که اگاں مئے راجمان ءَ کدر رواج بِه گِریت گڑا مردم جْوانیں راجمانی زندے گوں وشیں دلے گْوازینت کنت۔ پرچاکه ’کدری پرمانانی هم لوجیکل بنیاد هست‘[2]۔

دو مردم یک چیزے ءِ راستالی ءِ درگتءَ تپاک کننت که اے چی یے، بلئے آئی ءِ کدر ءِ درگتءَ بگندئے آ گوں یک دومی ءَ بیرگءَ (absolutely) تپاک مه کننت۔ بلئے چوش هم نه بیت که یکے وتی کدر ءَ بیرگءَ راست بِه لِیکیت ءُ دومیگ ءَ رَد به کنت۔

’هر کس وت زانت که راست ءُ رَد ءِ میان ءَ چے پرک هست‘۔ اے گپ ءَ اگاں ما کدری بنیاد ءَ بِه زانیں گڑا راست ءُ رَد یک راستالے ءِ وڑا ماں چاگرد ءُ ھال ءَ یک ھساب ءَ زانگ نه بنت، البته راستال ءِ بنیاد زانگ بنت۔ هما که ادبداری ءَ کدری نگاه ءَ چار ءُ تپّاس کننت، آ راست ءُ رَد ءِ میان ءِ پرک ءَ فکری ءُ اگلی رِدءَ تپّاسنت۔ آیانی نِزّ ءَ انسان ءَ شَرّیں وڑے ءَ فکری رِدءَ چیزے ءِ تپّاسگ ءِ درس دَیَگ بیت۔ اے درس ءِ برورد ءَ انسان راست ءُ رَد ءَ کدری بنیاد ءَ تپّاسگ ءُ زانگ ءَ سوبین بیت۔

II

یک زبریں انسانے، کسے ءَ وشیں وڑے ءَ گوں وتا سیکس کنگ ءَ رازی ءُ ٹهینگ ءِ هنر ءَ به زانت، ءُ پدا اے دِگراں هم بُه گْوشیت که ’من ترا وتی هنر ءَ سرپد کناں‘۔ گڑا بگندئے بازینے گوں همائی ءَ نزیکی به کنت۔ اے هم بوت کنت مردم رَد بِه کپنت۔ بلئے چوش اوں بوت کنت که آ زبریں انسان ءَ سنگینی ءَ نه زُورگ په آیاں مشکل به بیت[3]۔

ما چونائیا ھکءُدل سرجم ءَ سیکس ءِ بابت ءَ زانگ لوٹیں یا نه لوٹیں، اے درگت ءَ ما وت انگتاں مان گیشِّتگیں۔ ما سیکس ءِ بابت ءَ تکانسریں ءُ دلجمیں هم۔ البته ما اِشی ءِ بابت ءَ دائم گپ جَنَگ لوٹیں۔ گپ هم اے اُمیت ءَ جنیں که اِشی ءِ بابت ءَ جاهے سر به بئیں[4]۔

اگاں بچارئے ما سیکس ءِ بابت ءَ زانگ نه لوٹیں۔ اِشی ءِ بنیادی سبب اِش اِنت که مئے مَی٘ل تجربی نه اِنت ءُ چونائیا هم وتی جند ءِ تجربهانی اوپار کنگ گْران اِنت۔ بلکیں ما گوں سنگینی ءَ اے چیز ءَ نه تپّاسیں که انسانی تجربه ءِ تها سیکس چی ءِ چارگ ءَ جنت یا چی ءِ وڑا اِنت۔ دو مردم که سیکس کنت، ءُ یکے ءِ سرا دومی ءِ اگاں اثر هست، گڑا دوئیں سیکس ءِ بابت ءَ گپ جنگ نه لوٹ اَنت[5]۔ اِشی ءِ لوجیکل سببے اِش اِنت که یکے ءِ مَی٘ل اَنچوش اِنت که آ تجربهاں شوهاز کنت، پدا مارشت ءُ جذبهانی راستی ءِ سرا په واهگے ھیال ءَ گْور کنت[6]۔

اگاں ما گوں کسے ءَ وشیں وڑے ءَ سیکس کنگ ءِ وڑءُپیم ءِ سرا ھیال ءَ گْور به کنیں، گڑا اِشی ءِ اولی تجربه مارا وتی سرا کنگی اِنت[7]۔ یکے وَ اِش که ما دُراه زانیں سیکس ءِ بدنی راستی چی اَنت، بلئے ما اے سرپدی ءَ ڈالچار نه کنیں[8]۔ پدا هم اَینچوکه ما بائیولوجی ءَ زند ءِ ایدگه کارانی تها زُوریں اِینچو اِشی ءَ سیکس ءِ پُشدر ءَ نه زُوریں۔ البته چیزے ءِ ڈالچار نه کنگ ءِ واهگ مئے لوجِک ءِ تها مانیت[9]۔ چونائیا مهکم ءَ بستگیں یک نمونهے ءِ رِدءَ ما سیکس ءِ راستی ءَ بگندئے گپت به کنیں، بلئے اے درگتءَ مارا هر سوال بیرگءَ پچ کنگ لوٹیت بزاں مارا اے جیڑگ نه لوٹیت که ما چه ساری ءَ پَسّو ءَ به زانیں[10]۔ بلئے پدا هم ما لوٹیں که مئے گْورا جوابے به بیت[11]۔

II

په ی٘کّیں انسان ءَ جتاجتائیں چیز ءُ جتاجتائیں اُمراں سیکس چی یے؟ بزاں همے سیکس کسانی ءَ دِگرے ءُ ورناهی دِگرے، پدا جوانی ءَ دِگر ءُ پُهته اُمری ءَ دِگرے، ءُ میان اُمری ءَ دِگر ءُ پیری دِگرے۔ همے وڑا انسان رُدان بیت، ماں آئی ءِ تجربهاں آئی ءِ رَوِش (attitude) په سیکس ءَ هم بدل بُوَان بنت[12]۔ ما وتی اُمر ءِ یکشلی ءَ سیکس ءِ یکشلی سرپد بئیں ءُ چوکه اُمر پیشی ادبداری ءُ دین ءِ رهبندانی رِدءَ راجمانی رواجاں گْوازن اِنت، پمیشکا اے رواج هم ما په سیکس ءَ اَلمی زانتگ اَنت۔ پدا ما اے تیوگیں کاررِد (process) ءَ بُنروٗد (ارتقا) ءِ لیکه ءِ رِدءَ چاریں۔ اے وڑ بُوَگ ءِ سبب اِش اِنت که ’اگاں هرچی که مارا چه کدرت ءِ نیمگا رسیت، گڑا په هر یک نفرے ءَ رَستگین ءِ ارزشت ٹهینگ بیت‘[13]۔

جنسی ادبداری چونائیا گیشتر گوں نفر ءِ سیکس کنگ ءَ بندوک اِنت[14]۔ سیکس ادبداریں بنیاد ءَ هما وهد ءَ شَرّیں وڑے ءَ اگلی رِدءَ تپّاسگ بیت، وهدے سیکس راجمانی رواجے ءِ نگاه ءَ چارگ مه بیت۔ بلکیں سیکس اَنچو به بیت که انسان ءَ ارزانی ءَ رسیت، بزاں سیکس چو رازے ءَ مه بیت۔ سیکس چیروکائی مه بیت۔ پرچاکه چیروکائی مردم هما کار ءَ کننت که  آیاں اے کار وتی ربیدگ ءِ تها مزنیں مشکلے ءَ پد ’’په کنگ ءَ‘‘ رسنت[15]۔ سیکس پمیشکا چیروکائی مه بیت پرچاکه مردم گوں یک دومی ءِ هموجودی (co-existence) ءُ همکاری ءَ چه زمانگاں سیکس کنان ءُ پیداک اِنت[16]۔ بلئے بُن اسل ءَ بُنروٗد ءِ سفر هم یکشلا برجاه نه اِنت، آ چوشیں چیزے نه اِنت که مردماں وش اَتک به کنت[17]، بلکیں اگاں یکے ماں کُدرت (نیچر) ءَ رکگا اِنت، گڑا ماں چاگرد (environment) ءَ گچین هم بُوَگا اِنت۔ اگاں آ چاگرد ءَ جاگه کنگا اِنت، گڑا بُن اسل ءَ آ وتا وت جاهے دَیَگا اِنت۔ اے بُنروٗد نه اِنت که آ رکینتگ ئِے۔

سیکس مئے گْورا پمیشکا یک رازے ءَ مانیت که وهدے دین ءُ ادبداری ءِ رِدءَ اے گپ گیشّینگ به بیت که جنسی رواج چونائیا چی ءِ بابت ءَ اَنت، چوکه اے گپ ءِ گیشّینگ نه دین ءِ کار اِنت ءُ نه ادبداری ءِ[18]۔ بلکیں دین ءُ ادبداری هما رواج ءِ رِدءَ جنسی رواجاں چارنت، ’آ رواج دائم راجمانی یکشلی ءِ رِدءَ گوں دودءُربیدگ ءَ بندوک اَنت‘[19]۔ دین ءُ پیشی ادبداری سیکس ءَ هم اَنچیں رَوِشے ءِ ھساب ءَ بندگ لوٹنت که سیکس دائم ھیرواه به بیت ءُ به مانیت[20]۔ دین ءُ پیشی ادبداری چونائیا وت راجمانی رواج اَنت که دائم یکشلا ماننت۔ آیانی رِدءَ انسانی فکر ءُ سسا ءِ سرچمّگ ’چی بائد اِنت ءُ چی بائد نه اِنت‘ ءِ لیکه اِنت[21]۔ سیکس اے لیکه ءِ رِدءَ اَتک هم نه کنت، پرچاکه آ یک اَسَرداریں راستالے (fact) که په هر کس ءَ زاهر اِنت[22] ءُ آئی ءِ تها مردم ءِ وتی اَنچیں دِلواهی یے هست که دائم مانیت[23]۔ جنجال اِش اِنت که راجمانی رواجانی رِدءَ انسان ’سیکس ءِ اے مانا ءَ بےھال کنت ءُ دین ءُ ادبداری ءِ رِدءَ انسان وتی ذات ءِ کدرانی (value) بابت ءَ اے اُمیت ءَ جیڑیت که آئی ءِ هما کدر دِلواه بنت که دائم ماننت[24]۔

اَنچوکه بُرز ءِ تاکاں ما اے گپ ونتگ اَت که سیکس ءِ ادبداریں بنیاد هما وهد ءَ شَرّیں وڑے ءَ تپّاسگ بنت، وهدے آ راجمانی رواج ءِ بدل ءَ گوں جنسی رواج (sex custom) ءَ چارگ به بنت۔ راست اِنت که سیکس نه تهنا راجمانی پُشدرے داریت ءُ گوں همائی ءَ بندوک اِنت بلکیں آ وتی مانایاں هم چه همے راجمانی پُشدر ءَ کَشیت۔ پدا هم هر یکے وهدے سیکس ءِ بابت ءَ هر پی٘سلهے ءِ سرا فکر کنت، گڑا آ سیکس ءَ وتی ذاتی کارے سرپد بیت …. بلئے وهدے بازیں مردمے وتی فکر ءَ بدل به کنت ءُ پدا دُراه بیدء شَور ءُ سَلاه ءَ یک وڑا به کننت، گڑا گُڈسرا یک وڑیں آدتے سرجمیں راجمان ءِ سرا الکاپ ءَ اَسَر کنت[25]۔ جنسی رواج هما وهد ءَ مانیت، وهدے سیکس اے وڑا چارگ مه بیت۔ چه اے وڑا چارگ ءَ مردم پی٘سله کننت که آ دیما مارا تاوان بار کنت، البته آ اے نه جیڑنت که چونائیا مردمانی سیکس ءِ بابت ءَ یک وڑا بستگیں گُمان کنگ ءِ آدت چو نادراهی ءِ وڑا ماں راجمان ءَ شنگ بیت۔

البته جنسی رواج چوکه ساچشتی کار ءِ پلامرز اِنت، چه اِشی ءَ نوکیں چیزے پیداک بیت[26]۔ پمیشکا اے یکشلی یے نه اِنت، بلکیں یکشلی ءِ پروشگ اِنت۔ سیکس چیزانی گِرءُدار کنگ ءِ مستریں تاکت ءَ گوں همگْرنچ اِنت، اے ی٘کّیں وهد ءَ چه وتی تاکت ءَ اوں گیشتر کار کنت[27]۔

III

وهدے سیکس ءِ سرا باز گفت به بیت ءُ اے دُراهیں گفت یکجاه کنگ به بنت ءُ مزنیں گفتے گیشّینگ به بیت، گڑا سیکس ءِ گفتمانے جوڑ بیت۔ سیکس ءِ گفتمان ءِ رِدءَ نفر چوشیں کاملیں ذاتے نه اِنت که هر کار ءَ وت سرجمی ءَ ودی به کنت۔ بزاں اولسرا اے چارگی لوٹیت که هرچی په آئی ءَ گنج (sufficient) اِنت بائداِنت آ آئی ءَ سرجمی ءَ وت ودی به کنت[28]۔ پمیشکا سیکس یک ساچشتی کارے زانگ بیت۔

همے درگت ءَ ’وهدے زندگیں جسمے چه ای٘دگه دُراهیں زندگیں جسماں یکدَر ءَ جتا کنگ به بیت گڑا په آئی ءَ تهنا مِرَگ پَشت کپیت[29] که وت ئِے کنت۔ ماں سیکس ءِ گفتمان ءَ اگاں یک چیزے ءِ راستی زانگی اِنت گڑا آ تهنا هستیں ساھت بزاں ھال (present) ءِ تها پَدجَنَگ به بیت۔ پدا ھال هم بستو (concrete) نه اِنت، بلکیں گْوزَگا اِنت۔ بلئے ھال چوشیں هم راستی یے نه اِنت که ما آئی ءَ اے وڑا بهر به کنیں که ھال مادی شکل ءَ مانیت یا فکری۔ بلکیں ھال ءِ ارزشت په راستی یے ءَ پمیشکا هست که ماں ھال ءَ چیز ساچگ (create) بنت، اے رِدءَ ھال ساچشتی (creation) گْوشگ بیت[30]۔

وهدے ما گپ ءَ اے بنیاد ءَ به چاریں گڑا انسان ءِ وجود هما وهد ءَ فکری ءُ اگلی  بیت، وهدے اگل اَوَزی (reciprocal) به بیت۔ بزاں اگل چوشیں فکری زِکتے نه اِنت که تهنا انسان آئی ءَ گوں دومی ءَ بهر مه کنت یا اے تهنا هر یکے ءِ گْورا آئی ءِ ھساب ءَ به بیت که آ نه اگل ءَ گوں دِگر ءَ بهر (share) کُت کنت ءُ نه دِگرئیگ ءَ بهر زُرت کنت۔ چوکه اگل ءِ اَوَزی بُوَگ اے زاهر کنت که نفر نه وتی ذات ءِ تها کامل اِنت ءُ نه گنج۔ اے وڑا ’وجود ءِ متلب اِنت گوں ای٘دگه وجوداں سیادی ءِ برجاه دارگ‘[31]۔ اے سیادی چه دوئیں نیمگاں برجاه دارگ بیت، بزاں چاپ دو دستاں توار کنت۔ وهدے وجود هم اَوَزی به بیت گڑا یک وجودے چه دومی ءَ بُرزتر ءُ مستر نه بیت، بلکیں اے بُرزتر ءُ جَهلتری ءِ تپاوت هلاس بیت۔ گْوشت کنئے که ’زند په هر یکے ءِ شریداری ءِ رِدءَ په هر یکے ءَ آزات بیت‘[32]۔

چوکه گپ سیکس ءِ بُوَگا اِنت، بلئے اِشی ءِ تها پرٛکءُپی٘ر ءِ گپ نه بُوَگا اِنت که فِلاں ءِ سیکس یا جینڈر فِلاں اِنت ءُ فِلاں ءِ فِلاں۔ چه سیکس ءِ اَوَزی بُوَگ ءَ جنیڈر هم اَوَزی بیت۔ اے وڑا جینڈر ءِ گالبندی مانا هم هلاس بیت۔ چونائیا وجود ءِ اَوَزی بُوَگ ءَ انسان ءِ وجود گوں سیکس ءَ پیوست کُتگ ءُ بستگ۔ انسان ءِ وجود ءَ گوں سیکس ءَ پیوست کنگ ءَ پد جینڈر ءِ تپاوت هم اے درگت ءَ هلاس کنگ بوتگ اَنت که انسان ءِ کار سیکس کنگ اِنت، آ سیکس دوذوکی بیت، ساتری بیت یا جنین ءُ مردین ءِ بیت۔

اگاں انسان ءِ سیکس آئی ءَ تکلیف به کنت گڑا اے سیکس شَرّیں سیکسے گْوشگ نه بیت، بلکیں هما سیکس شَر نه اِنت که آ جنسی  گنوکی یے (sexual deviation)۔ همے سیکس ءِ شَرّ ءُ ھراب بُوَگ سیکس ءِ ادبداری زانگ بیت۔

سیکس ءِ اَوَزی بُوَگ ءِ بائیولوجیکل بنیادے هم هست که آئی ءِ تها ادبداری شوهازگ نه بیت۔ هرچاکه اے لیکه ءِ رِدءَ انسان یک ’کارکنوکے‘ ءِ نگاه ءَ چارگ بیت۔ بزاں فِلانی چونائیا فلانی نه اِنت بلکیں یک کارکنوکے۔ اے وڑا هم انسان ءِ جینڈر هلاس بیت۔ بزاں انسان یک سیکس کنوکے آ کُجام هم وڑے ءَ سیکس کنگ لوٹیت، به کنت۔ پرچاکه دراه کارکنوک اَنت۔ کارکنوک نه شَرّ بیت نه ھراب، بلکیں کار شَرّ ءُ ھراب بیت۔ چونائیا زندگی ھِرکت ءِ تها زاهر بیت بزاں ھِرکت زندگ بُوَگ ءِ نشانی اِنت۔ ھِرکت ءِ برورد ءَ ردوم بیت ءُ اِشی ءِ پَدکِرد سما (consciousness) اِنت۔ اے سرجمیں کارّیچ چاگردی (environmental) سیادی ءِ سبب ءُ بنیاد ءَ ماننت[33]۔

IV

آیا بلوچ اے گُفتمان ءِ بهر بوت کنت؟ اِشی ءِ جواب اے بوت کنت که سیکس ءِ جتاهیں ادبداری یے ءِ شوهازگ ءِ جنجال هما وهد ءَ دیما اَتک وهدے آیاں وتی راجمانی رهبند نفر ءِ رکینگ ءَ اے بنیاد ءَ ٹهینت اَنت که سیکس چوشیں چیزے نه اِنت که انسان آئی ءَ تهنا وتی گْورا به داریت ءُ په آئی ءَ همنچُک ءَ گنج اِنت که آئی ءَ گوں دِگر ءَ بهر مه کنت ئِے۔ بزاں انسان ءَ نه لوٹیت که دِگر ءَ گوں وتی سیکس ءَ بهر به کنت۔ بلئے مارا زانگی لوٹیت که آ سیکس ءَ پمیشکا اَوَزی کنگ لوٹنت که آیاں جینڈر ءِ لیکه فکری بنیاد ءَ پروشگی اِنت۔ آ اولسرا اگل ءَ اَوَزی کننت، پدا وجود ءَ ءُ پدا سیکس ءَ۔ پرچاکه بےوجود ءَ سیکس بوت نه کنت۔ اے درگتءَ آیانی ھیال ءَ نفر ءَ فکری رِدءَ هما چیزانی بهر کنگ ءِ تاکت دَیَگ بیت که پیش ءَ په نفر ءَ دائم راز ءِ وڑا منتگ اَنت۔ وهدے اگل راز ءَ آشکار کنت گڑا بزاں نفر ءَ اگلی بنیاد ءَ آزاتی ءِ اَنچیں مستری یے گون که آ راجمان ءِ تها هرچی بُه لوٹیت ’ٹهینت‘ کنت۔ آئی ءَ راجمان ءِ تها گون کَپَگی نه اِنت بلکیں راجمان وتی ھساب ءَ ٹهینگی اِنت۔

 سیکس ءِ اَوَزی بُوَگ ءَ گوں نفر ءَ وتی راجی زند یا ربیت ءِ سرا اَنچو سوال چِست کُت گْوشئے ربیت نفرئیگ اِنت۔ اے وڑا نفر همائی ءَ گوں سیکس یا اگل ءَ اَوَز کنگ (reciprocate) ءَ اَت اگاں آ ربیت ءَ وتی ناں، بلکیں وتا ربیت ءِ کنگا اَت، گڑا آ نفر دیما نه اگلی انسانے ءَ مانیت ءُ ناں سرشتی انسانے ءَ که آئی ءِ سرشت ءَ سیکس هست، بلئے آ وتی سرشت ءِ تلب ءَ کُشگا اِنت ءُ نادُراه بُوَان اِنت۔ اگاں آ اگل ءَ یک اَنچیں نفرے ءَ گوں اَوَز کنان اِنت که آ هم ربیت ءَ اَنچو چارگ ءُ تپّاسگا اِنت که آئیگ اِنت، گڑا آیانی میان ءَ هموجودی جوڑ بیت که آیاں چه دراهیں راجدپتری گچیناں (historical particularities) کَشیت۔ نوں په آئی ءَ کُجام هم راجے ءِ باسک بُوَگ آئی ءِ اگلی ءُ سیکشوئل اَوَزی ءَ هوار آئی ءِ هموجودی ءَ هلاس کنت۔ اِشانی هلاسی کنیتھ واکر ءَ اے وڑا زاهر کُتگ که بیدء اِشاں انسان کامل بُوَگ ءِ نیمگا ھِرکت نه کنت، ردوم نه گریت ءُ سُدءُسما نه بیت۔ اے وڑا انسان ءَ هر کار سرجمی ءَ وت ودی کنگی اِنت، چوکه اے بوت نه کنت۔ بلئے همے ’نه بُوَگ‘ ءَ گوں آ سرپد بیت که اے ’نه بُوَگ‘ هم گنجے۔

گپ ءِ متلب همیش اِنت که ربیت شناس چی جیڑگا اِنت۔ اے درگت ءَ ربیت شناسی ءَ چه گیشتر نفری زند ءِ پلامرز اگل ءُ سیکس ءِ اَوَز ءَ گوں هموجودیں نفر گیشءُگیوار کننت۔ بُنکی نُکته اِش اِنت که نفر ءِ نفری راز آشکار کنگ لوٹنت، راز هما وهد ءَ ماننت وهدے رهبند ءُ ربیت نفر ءِ بنت۔

من اے سرپد باں که ماں ربیت ءَ پمیشکا راز نیست پرچا که ربیت په درستان اِنت۔ اِشی ءِ متلب اے نه اِنت که کسے آئی ءَ وتی به کنت۔ بلکیں دراه ربیت ئیگ اَنت۔ پمیشکا ما ربیت ءَ نه ٹهینیں بلکیں ماں ربیت ءَ گون کپیں۔ راز همائی ءِ بیت که ربیت ءَ ٹهینت کنت۔ بلوچ ءِ گْورا داں هما وهد ءَ سیکس ءِ گپ چو رازے ءَ نه بوتگ، داں که آئی ءَ اے پهمِتگ اَت که آ ماں ربیت ءَ اِنت بلکیں هر گْورا ربیت اِنت۔

وهدے نفر ءَ ربیت ٹهینان کُت گڑا آ چه ربیت ءَ ڈن در اَتک۔ اے بنیاد ءَ بےربیتی کارئِے بندات کُت۔ پدا هما کاراں انسان ءِ تب ءَ گوں پیوست کنان ءَ کرار کنت که ’هر نفر چه تها همے وڑ بیت‘ گڑا بلوچ هم نفرے۔ پمیشکا ساری ءَ بلوچ راجے اَت، نوں نفرے جوڑ بوت۔ چوکه راز مدام چه ربیت ءَ ڈن رَسنت پمیشکا هلوت بنت۔

«»«»«»

شِنگکار: جیوز پبلیکیشنز گوادر

شنگ: راجمان 8۔ جولائی 2022

---

[1]- John Wilson. Logic and Sexual Morality. (Middlesex: Penguin Books. 1965), pp. 32-33

[2]- Ibid, p. 33

[3]- John Wilson. Logic and Sexual Morality. (Middlesex: Penguin Books. 1965), p. 20

[4]- Ibid,

[5]- see, Ibid, pp. 20-21

[6]- Ibid, p, 21

[7]- Ibid,

[8]- Ibid,

[9]- Ibid,

[10]- Ibid, p, 25

[11]- Ibid,

[12]- Abram Kardiner. Sex and Morality. (London: Routledge & Kegan Paul Ltd. 1955), p. 23

[13]- Ibid,

[14]- Ibid, p. 14

[15]- Ibid, p. 16

[16]- see, Ibid, p. 22

[17]- Ibid,

[18]- Ibid, p. 17

[19]- Ibid, p. 15

[20]- Ibid, p. 18

[21]- Ibid, p. 18

[22]- Ibid, p. 23

[23]- Ibid, p. 23

[24]- Ibid, p. 24

[25]- Ibid, p. 25

[26]- Ibid, p. 31

[27]- Ibid, p. 30

[28]۔ همے گپ کنیتھ واکر ءُ پیٹرفلیچر ءِ کتاب ’جنس کا نفسیاتی پهلو‘ ءِ بنداتی گفت (premise) اِنت، که 07 تاکدیم ءِ تها گیوار اِنت۔

[29]-  Kenneth Walker and Peter Fletcher. جنس کا نفسیاتی پهلو. 2^nd edition. )Lahore: Maktaba-i-Meri Library. 1965(, p. 17

[30]- See, Ibid, p. 07

[31]- Ibid, p. 08

[32]- Ibid,

[33]- Ibid, p. 18